ಅಪ್ಪನ ದಿನಕ್ಕೊಂದು ಕವನ 20 .6 2020

ನನ್ನಪ್ಪ

ಬೆಳಗಿನ ಜಾವವೇ ಬೇಗನೆ ಎದ್ದು

ಯೋಗಾಸನವನು ಮಾಡುವನು

ಹಟ್ಟಿಯ ದನಗಳ ಮೈಯನು ತಿಕ್ಕುತ

ಹಾಲನು ತಾನು ಕರೆಯುವನು

ದೇವರ ಪೂಜೆಯ  ಮಾಡುತ

ದಿನವೂ 

ಭಕ್ತಿಯಲಿ ದೇವರ ಬೇಡುವನು

ಓದಲು ಬರೆಯಲು ಕಲಿಸಿದ ಅಪ್ಪ

ಶಿಕ್ಷಕನಾಗಿಯೂ ಹೆಸರನು ಪಡೆದಿಹನು

ಹದಿಮೂರು ಮಕ್ಕಳ ಪಿತ ತಾನಾದರು

ನಗುತಲಿ  ಸಂಸಾರ ರಥವನು ಎಳೆಯುವನು

ಮಕ್ಕಳ ಮನದಲಿ ಅಕ್ಷರ ಬೀಜವ

ಬಿತ್ತುತ ತಾನೂ ನಲಿಯುವನು

ಮಕ್ಕಳ ಎಲ್ಲರ ದಡವನು ಸೇರಿಸಿ.

ತೃಪ್ತಿಯ ತಾನು ಕಂಡಿಹನು

ಬಾಳಲಿ ಬರುವ ಕಷ್ಟಗಳನ್ನು

ಎದುರಿಸುವ ಛಲವನು ತುಂಬಿಹನು

ಅಮ್ಮನ ಜತೆಯಲಿ ಪ್ರೀತಿಯಲಿರುತ

ಚಂದದಿ ಸಂಸಾರ ಮಾಡಿಹನು

ಹೋಮಿಯೋಪತಿಯಲಿ ಯೂ ಸಿದ್ಧಹಸ್ತರು

 ಎನ್ನುವ ಕೀರ್ತಿಯ ಪಡೆದಿಹನು

 

ಬಡವರಿಗೆಲ್ಲ ಉಚಿತವಾಗಿ ಮದ್ದನು

ಕೊಡುತ ಬಡವರ ಬಂಧು ಎನಿಸಿಹನು

ಅಜ್ಜನು ಕಟ್ಟಿದ ಶಾಲೆಯ  ನಡೆಸುತ

ಶಾಲೆಯ ಏಳಿಗೆಗೆ ದುಡಿದಿಹನು

 ನೋವುಗಳೆಲ್ಲವ ಮನದಲಿ ನುಂಗಿ

 ಛಲದಲಿ ಜೀವನ ನಡೆಸಿಹನು

ಕಷ್ಟವ ಗಣಿಸದೆ ನಿಷ್ಠೆಯ ತೋರುತ

ಬೆಳೆಸಿದ ನಮ್ಮನು ನನ್ನಪ್ಪ

ಅಪ್ಪನ ದಿನದಲಿ ಮಾತ್ರವೇ ನೆನೆಯದೆ

ನಿತ್ಯವೂ ನೆನೆಯುವೆ ಬದುಕಲು ಕಲಿಸಿದ ಅಪ್ಪನನು

 

 ಪಂಕಜಾ.ಕೆ.ಮುಡಿಪು

 ನಿವೃತ್ತ ಅಸ್ಸಿಸ್ಟಂಟ್ ಪೋಸ್ಟ್ ಮಾಸ್ಟರ್