ಸ್ಕಂದ ಮಾತಾ ನಮೋಸ್ತುತೆ

ಐದನೇ ದಿನ

ಸ್ಕಂದಮಾತಾ. ನಮೋಸ್ತುತೆ

ಭಾಮಿನಿ ಷಟ್ಪದಿ

ಸ್ಕಂದ ಮಾತಾ ಗೌರಿ ದೇವಿಗೆ

ಚಂದದಿಂದಲಿ ಪೂಜೆ  ಮಾಡುವೆ

ಬಂದ ಕಷ್ಟವು ಕಳೆದು ಮನಸಿಗೆ ಶಾಂತಿ ನೀಡಮ್ಮ

ಅಂದ ಚಂದದ ಹೂಗಳರ್ಪಿಸಿ

ನಿಂದೆ ನಿನ್ನಡಿಗೆರಗಿ ನಮಿಸುತ 

ಮುಂದೆ ನನ್ನಯ ಬಾಳ ಹಾದಿಗೆ ಹೂವ ಹಾಸಮ್ಮ

ಹಳದಿ ಬಣ್ಣದಿ ಮಿಂಚುತಿರುತಿಹ

ನಳಿನ ನಾಭನ ರಮಣಿ ಪಾರ್ವತಿ

ಕಳೆದು  ಬಿಡು ನೀ ನಮ್ಮ ಮನಸಿನ ಚಿಂತೆಗಳನೆಲ್ಲಾ 

ಬೆಳೆದ ಫಲಗಳನರ್ಪಿಸುತ್ತಲಿ

ಕಳೆದು ಕೊಳ್ಳುತ ಮನದ ತಮವನು

ಬಳಿವೆ ನಿನ್ನಯ ಪಾದಚರಣಕೆ  ಹಳದಿ ಕುಂಕುಮವ

ಶರಣು ಬಂದವರನ್ನು ಕಾಯುವ

ಹರನ ಮಡದಿಗೆ ಕರವ ಮುಗಿಯುವೆ

ಶಿರವ ಬಾಗುತ ಪಾದ ಕಮಲಕ್ಕೆರಗಿ. ಪೊಡಮಡುವೆ 

ಪರಮ ಕರುಣೆಯ ಪ್ರೇಮ ಜ್ಯೋತಿಯು 

ಕರೆದು ಕೊಡುವಳು  ಸುಖದ ಬಟ್ಟಲ

ತೆರೆದ ಹೃದಯದಿ ನಾಮ ಜಪವನು ಮಾಡ್ವ ಬಕುತರಿಗೆ

ರಿಕ್ತ ಮನದಲಿ ತುಂಬಿ ನಿನ್ನನು

ಭಕ್ತಿಯಿಂದಲಿ  ಹಾಡಿ ಹೊಗಳುವೆ

ಶಕ್ತನಾಗಿಸು ನಾಮ ಪಠಿಸಲು ಬೇಡಿ ಕೊಳ್ಳುವೆನು

ರಕ್ತಚಂದನವನ್ನು ಧರಿಸಿಹ

ರಕ್ತ ಬೀಜಾಸುರನ  ವಧಿಸಿದ

ಶಕ್ತಿ ರೂಪಿಣಿ  ಮಾತೆ  ನೆನೆಯುವೆ ನಿನ್ನ ಚರಣವನು 

ಪಂಕಜಾ.ಕೆ.ರಾಮಭಟ್

15.10.2026