ಸುಂದರ ಸಂಸಾರ
ಚಿಕ್ಕ ಪ್ರಾಯದಲ್ಲಿ ಗಂಡ ಸತ್ತಾಗ ಇಬ್ಬರು ಚಿಕ್ಕಮಕ್ಕಳನ್ನು ಹಿಡಿದುಕೊಂಡು ದಿಕ್ಕೇ ತೋಚದೆ ನಿಂತಿದ್ದ ಸುಗುಣಮ್ಮನಿಗೆ ಯಾರ ಸಹಾಯವೂ ಸಿಗದಾಗ ಸುತ್ತುಮತ್ತಿನ ಮನೆಯಲ್ಲಿ ಮನೆಕೆಲಸ ಮಾಡುತ್ತಾ ಅವರ ಮಕ್ಕಳಿಗೆ ತನ್ನಿಂದ ಆದಷ್ಟು ಒಳ್ಳೆಯ ವಿಚಾರಗಳನ್ನು ಕಲಿಸುತ್ತಾ ಒಬ್ಬಂಟಿಯಾಗಿ ಕಷ್ಟಪಟ್ಟು ಮಕ್ಕಳನ್ನು ಸಾಕಿ ವಿದ್ಯಾಭ್ಯಾಸ ಕೊಟ್ಟು ಉತ್ತಮ ಸಂಸ್ಕಾರಗಳನ್ನು ಕಲಿಸಿ ಸೂಕ್ತ ಸಮಯದಲ್ಲಿ ಮಕ್ಕಳಿಬ್ಬರ ವಿವಾಹವನ್ನು ಉತ್ತಮ ಮನೆತನದ ಹೆಣ್ಣು ಮಕ್ಕಳ ಜತೆ ನೆರವೇರಿಸಿ ನೆಮ್ಮದಿಯ ನಿಟ್ಟುಸಿರು ಬಿಟ್ಟರು.
ಮನೆಗೆ ಬಂದ ಸೊಸೆಯರಿಬ್ಬರೂ ಸ್ವಂತ ಅಕ್ಕ ತಂಗಿಯರಂತೆ ಹೊಂದಿಕೊಂಡಿದ್ದು ಅತ್ತೆ ಸುಗುಣಮ್ಮನನ್ನು ತಮ್ಮ ತಾಯಿಯಂತೆ ಕಾಣುವ ಒಳ್ಳೆಯ ಗುಣದ ಹೆಣ್ಣು ಮಕ್ಕಳಾಗಿದ್ದುದರಿಂದ ಸುಗುಣಮ್ಮ ವೃದ್ದಾಪ್ಯದಲ್ಲಿ ಯಾವುದೇ ಚಿಂತೆಯಿಲ್ಲದೆ ಸೊಸೆಯಂದಿರ ಕೆಲಸದಲ್ಲಿ ಅಷ್ಟೋ ಇಷ್ಟೋ ಸಹಾಯ ಮಾಡುತ್ತಾ ಬಿಡುವಿನ ವೇಳೆಯಲ್ಲಿ ರಾಮಾಯಣ ಮಹಾಭಾರತ ಇತ್ಯಾದಿ ಸದ್ಗ್ರಂಥಗಳನ್ನು ಓದುತ್ತಾ ಮೊಮ್ಮಕ್ಕಳಿಗೆ ಕಥೆಗಳನ್ನು ಹೇಳುತ್ತಾ ಕಾಲ ಕಳೆಯುತ್ತಿದ್ದರು.
ಅಜ್ಜಿಯೆಂದರೆ ಎಲ್ಲಾ ಮಕ್ಕಳಿಗೂ ತುಂಬಾ ಇಷ್ಟ ಶಾಲೆಯಿಂದ ಬಂದ ತಕ್ಷಣ ಅಜ್ಜಿಯ ಸುತ್ತಲೂ ಕುಳಿತು ಕಥೆಗಾಗಿ ಪೀಡಿಸುತ್ತಿದ್ದರು.ಇತ್ತಿಚೆಗೆ ಕೊರೊನಾದ ಕಾರಣದಿಂದ ಶಾಲೆ ಬಂದ್ ಆದಾಗ ಮಕ್ಕಳು ಮನೆಯಲ್ಲೇ ಇರಬೇಕಾದ ಸಂಧರ್ಭದಲ್ಲಿ ಮಕ್ಕಳಿಗೆ ಮನೆಯಲ್ಲೇ ಪಾಠಗಳನ್ನು ಸಣ್ಣ ಸಣ್ಣ ಕಥೆಗಳ ಮುಖಾಂತರ ಹೇಳುತ್ರಾ ಮಕ್ಕಳನ್ನು ಶಾಲಾ ಪಠ್ಯಪುಸ್ತಕದಿಂದ ವಂಚಿತರಾಗದಂತೆ ನೋಡಿಕೊಳ್ಳುತ್ತಿದ್ದರು.
ಆ ದಿನ ಮಕ್ಕಳಿಗೆ ತುಂಬಾ ಉದಾಸೀನವಾಗುತ್ತಿತ್ತು ಹೊರಗೆ ಹೋಗಬೇಕು ಎಂದು ಹಠ ಮಾಡಿ ತಾಯಿಯ ಕೈಯಲ್ಲಿ ಪೆಟ್ಟು ತಿಂದ ಮಕ್ಕಳು ಅಜ್ಜಿಯನ್ನು ಪೀಡಿಸತೊಡಗಿದರು. ಕೊರೊನಾ ಲಾಕ್ಡೌನ್ ಇದ್ದುದರಿಂದ ಹೊರಗೆ ಹೋಗುವುದು ಆಸಾಧ್ಯವೆಂದು ಎಷ್ಟು ಹೇಳಿದರೂ ಮಕ್ಕಳು ಕೇಳದೆ ಇದ್ದುದರಿಂದ ಆಕೆ ಮಕ್ಕಳನ್ನು ಸಮಾಧಾನ ಪಡಿಸಲು ಪಂಚತಂತ್ರದ ಕಥೆಯ ಪುಸ್ತಕವನ್ನು ಮಡಿಲಲ್ಲಿ ಇಟ್ಟುಕೊಂಡು ಕಥೆ ಹೇಳಲು ಪ್ರಾರಂಭಿಸಿದರು.ಅಜ್ಜಿಯ ಕಥೆಯನ್ನು ಕೇಳುತ್ತಾ ಮಕ್ಕಳೆಲ್ಲಾ ಸಂತೋಷದಿಂದ ತಮ್ಮ ಬೇಡಿಕೆಯನ್ನು ಮರೆತು ಅಜ್ಜಿಯ ಸುತ್ತ ಕುಳಿತು ಕುತೂಹಲದಿಂದ ಕಥೆಯನ್ನು ಕೇಳಿಸಿ ಕೊಳ್ಳುತ್ತಿದ್ದರು. ಶಾಲೆಗಳು ಬಂದ್ ಆದರೂ ಸುಗುಣಳಂತ ವಿದ್ಯಾವತಿ ಅಜ್ಜಿ ಮನೆಯಲ್ಲಿ ಇದ್ದುದರಿಂದ ಮಕ್ಕಳು ಶಾಲೆಯ ಪಾಠದ ಜತೆ ವೀರರ ಧೀರರ ಕಥೆಗಳನ್ನು ಕೇಳುತ್ತ ಉತ್ತಮ ಸಂಸ್ಕಾರವಂತರಾಗಿ ಬೆಳೆಯುತ್ತಿದ್ದರು. ಮನೆಯಲ್ಲಿ ಹಿರಿಯರು ಇದ್ದರೆ ಮಕ್ಕಳ ಮುಂದಿನ ಜೀವನ ಉತ್ತಮವಾಗಿ ಅವರು ಸಂಸ್ಕಾರವಂತರಾಗಿ ಬೆಳೆಯುತ್ತಾರೆ ಎನ್ನುವ ಸತ್ಯವನ್ನು ಸುಗುಣಮ್ಮ ತನ್ನ ನಡೆ ನುಡಿಯ ಮುಖಾಂತರ ತೋರಿಸಿ ಒಗ್ಗಟ್ಟಿನ ಸಹಬಾಳ್ವೆಯ ಮಹತ್ವವನ್ನು ಮಕ್ಕಳಿಗೆ ಕಲಿಸುತ್ತಾ ಸುಂದರ ಸಂಸಾರದ ಪರಿಕಲ್ಪನೆಯನ್ನು ನೆರೆಕರೆಯ ಜನರಿಗೆ ತೋರಿಸಿ ಮೇಲ್ಪಂಕ್ತಿಯಾಗಿ ಮಾದರಿಯಾದರು
ಪಂಕಜಾ.ಕೆ. ಮುಡಿಪುU
Comments
Post a Comment