ಹುಚ್ಚು.ಮಳೆ

ಹುಚ್ಚು ಮಳೆ
ಬಾನು ತುಂಬಿದ ಕರಿಯ ಮುಗಿಲು
ಅಟ್ಟಹಾಸದಿ ಮೆರೆದು ಸುರಿಸಿದ ಮಳೆಗೆ
ಮನದಲಿ ತುಂಬಿದೆ ಏನೋ ಆವೇಗ

ಜೀವಜಂತುಗಳೆಲ್ಲಾ ಹನಿಮಳೆಗೆ ನೆನೆದು
ಸಂಭ್ರಮಿಸುತ್ತಿರುವ ಕ್ಷಣ ಗಳಲ್ಲೇ
ಆಗಸವೇ ತೂತಾಗುವಂತೆ ನೀ ಸುರಿಯಬಹುದೇ

ಮನೆ ಮಠ ಗಳೆಲ್ಲಾ ಕೊಚ್ಚಿ ಹೋಗುವಂತ
ಆವೇಗ  ಅಟ್ಟಹಾಸ ನಿನಗೇಕೆ ವರುಣ
ನೀ ಮಾಡಿದ ಅಟ್ಟಹಾಸಕೆ ಬುವಿಯಾಯಿತು ಮಸಣ

ಎಲ್ಲೆಲ್ಲೂ ತುಂಬಿದೆ ಭಗ್ನಅವಶೇಷಗಳು
ಅವಶೇಷಗಳ ಅಡಿಯಲ್ಲಿ  ಹೂತ ಕನಸುಗಳು
ಸುಂದರ ನಾಳೆಗಳ  ಕಾಣದ ನತದೃಷ್ಟರು

ಬಾಳಾಯಿತು ಹರಿದ ಬಟ್ಟೆ
ಗೋಳಾಯಿತು ಬಾಳಬಟ್ಟೆ
ಸಂಬಂಧದ ಹೆಣದ ಮೇಲೆ ಹರಡಿದೆ ಬಟ್ಟೆ
ಹೊಟ್ಟೆಗೆ ಕಟ್ಟಬೇಕಾದೀತು ತಣ್ಣೀರ ಬಟ್ಟೆ

ಸ್ವಾರ್ಥ ದುರಾಸೆಗಳು ಕೊಚ್ಚಿ ಹೋಯಿತು
ನಾನು ನನ್ನದೆನ್ನುವ ಮಮಕಾರ ಮರೆಯಿತು
ಉಳಿದಿರುವುದೊಂದೆ ಆದು ನಿನ್ನ ಕರುಣೆ
ಪಂಕಜಾ.ಕೆ.