*ಅನ್ನದಾತ*
*~~~~~~~~~~*
ಮಳೆ ಬಿಸಿಲೆನ್ನದೆ ಚಳಿಯನು ಗಣಿಸದೆ
ಗದ್ದೆಯ ಕೆಸರಲಿ ದುಡಿಯುವನು |
ಹೊಲವನು ಉಳುತಲಿ ಬೀಜವ ಬಿತ್ತುತ
ನೇಜಿಯು ಮೊಳೆಯಲು ಕಾಯುವನು ||
ಕಷ್ಟವ ಗಣಿಸದೆ ನಷ್ಟಕೆ ಹೆದರದೆ
ಇಷ್ಟದ ಕಾಯಕ ಮಾಡುವನು |
ಸುಗ್ಗಿಯ ಕಾಲದಿ ಸಡಗರದಿಂದಲಿ
ಹಿಗ್ಗುತ ಭೂಮಿಗೆ ನಮಿಸುವನು ||
ಕಾಯಕವೆಂದರೆ ದೇವರು ಎನ್ನುತ
ಬೆವರಿನ ಫಲವನು ಗಳಿಸುವನು |
ನೇಗಿಲಯೋಗಿಯು ಅನ್ನವ ನೀಡುತ
ದೇಶದ ಹಸಿವನು ತಣಿಸುವನು ||
ನಮಿಸುವ ಗೆಳೆಯರೆ ದುಡಿಯುವ ರೈತಗೆ
ಅನುದಿನ ಅನ್ನವ ಕೊಡುವವಗೆ |
ಮೈಯನು ಬಗ್ಗಿಸಿ ದೇಹವ ಕುಗ್ಗಿಸಿ
ಛಲದಲಿ ಮುಂದಕೆ ನಡೆವವಗೆ ||
ಪಂಕಜಾ. ಕೆ
Comments
Post a Comment