ಅರುಣ ರಾಗ ವಿಕ್ರಮ ವಾರಪತ್ರಿಕೆ 29..9 2019 ರಲ್ಲಿ ಪ್ರಕಟಿತ

ಅರುಣ ರಾಗ

ಹಸಿರಿನ ಹುಲ್ಲಿನ ಮೇಲೆ
ಹರಡಿರುವ ಇಬ್ಬನಿಯ
ಹನಿಗಳು ಮುತ್ತಿನ ಮಣಿಗಳ
ತೆರದಿ ತೋರುತಿದೆ

ರವಿಕಿರಣದ ಸ್ಪರ್ಶಕ್ಕೆ
ಕರಗಿ ನೀರಾಗುತ
ಸಪ್ತವರ್ಣದ ತೋರಣವ
ಕಟ್ಟಿ  ನಲಿಯುತ್ತಿದೆ

ಮಂದ ಮಾರುತ ಬೀಸಿ
ಮಲ್ಲಿಗೆಯ ಕಂಪನುಹೊತ್ತು
ಮನಕೆ ಮುದ ತುಂಬಿ
ಮನವ ಕೆಣಕುತಿದೆ

ರವಿ ಉದಯಿಸುತ  ಬಂದ
ಆಗಸದ ತುಂಬೆಲ್ಲ
ತುಂಬಿದೆ ಅರುಣರಾಗ
ಧರೆಗೆ ಮಿಂಚಿನ ಸಂಚಾರ

ಉದಯರಾಗವ ಹಾಡಿ
ಕೋಗಿಲೆಯು ಕುಹಿಲಿಡುತ
ಮನಕೆ ಹೊಸ ಹುರುಪನು ತುಂಬಿ
ಮೈಮನವು ಮತ್ತಿನಲಿ ತೇಲುತಿದೆ

ಬುವಿಯಲಿ ಹರಡಿರುವ
ಚೆಲುಬಣ್ಣಗಳ ನೋಟ
ತಂಗಾಳಿಯ ತಂಪಿನಲಿ
ಮೈಮನಕೆ ಉಲ್ಲಾಸ ಹಾಸ
ಪಂಕಜಾ.ಕೆ.