ನೆನಪಿನ ದೋಣಿ ಚಿತ್ರ ಕವನ

ಚಿತ್ರ ಕವನ ಸ್ಪರ್ಧೆಗಾಗಿ

ನೆನಪಿನ ದೋಣಿ

ಊರ ಮುಂದಿನ   ಬಾವಿಕಟ್ಟೆ

ಹೆಂಗಳೆಯರ ಹರಟೆಯ ಕಟ್ಟೆ

ನೀರೆಯ  ನಡುವಿನಲ್ಲಿ ಒಂದು ಕೊಡ

ನೀರ ಸೆಳೆಯುವ ರಾಟೆಯ ಗಡ ಗಡ

ನಿತ್ಯವೂ ಹೆಂಗಳೆಯರ ಕಲರವ

ಕೈ ಬಳೆಗಳ ಕಿಂಕಿಣಿ ನಾದದ ತರಂಗ

ಮನೆ ಮನೆಯ ಸುಖದುಃಖದ ಕಥೆ

ಹಂಚಿ ಸಾಂತ್ವನಿಸುವ ತಾಣವಂತೆ

ಸುತ್ತಲೂ ತುಂಬಿದೆ ಕಸಕಡ್ಡಿಗಳ ಲೋಕ

ಗತಕಾಲದ ವೈಭವದ ಪ್ರತೀಕ

ಇಣಿಕಿ ನೋಡುವವರಿಲ್ಲದೆ ಪಾಳುಬಿದ್ದಿದೆ ಬಾವಿ

ಹಿಂದಿನ ವೈಭವವ ಪಳೆಯುಳಿಕೆಯಾಗುತ್ತಿದೆ ಬಾವಿ

ಮನೆ ಮನೆಯಲೂ ಕೊಳವೆ ಬಾವಿಯದೇ ಲೋಕ

ಗುಂಡಿ ಒತ್ತಿದರೆ ಸುರಿಯುವ ಜಲಧಾರೆಯದೆ ಜಳಕ

ನೀರ ಸೆಳೆಯುವ ರಾಟೆಯ ಗಡ ಗಡ ಸದ್ದಿಲ್ಲ

ಬಾವಿಕಟ್ಟೆಯಲಿ ಹೆಂಗಳೆಯರ ಕಲರವವಿಲ್ಲ

ಬಾವಿಯೊಳಗಿನ  ಕಪ್ಪೆಯಂತೆ ಜೀವನ

ಪ್ರತಿಯೊಂದು ಮನೆಗೂ ಭದ್ರಗೇಟಿನ ಆವರಣ

ನೆನಪಿನ ದೋಣಿಯಲಿ ತೇಲುತ್ತಿದೆ ಮನ

ಬಂದೀತೇ ಇನ್ನೊಮ್ಮೆ ಅಂತಹ ದಿನ

ಪಂಕಜಾ.ಕೆ