ಗಜಲ್ ಅಚ್ಚರಿಯೇ

ಗಜಲ್

ರವಿಯು ಬೇಗನೆ ಮುಳುಗಿದನೆಂದು ಅಚ್ಚರಿಯೇ ಮಗು

ಆಟ ಆಡಲು ಸಮಯ ಸಾಲಲಿಲ್ಲವೆಂದು ಬೇಸರವೇ ಮಗು

ಹಗಲು ಕಳೆದು ರಾತ್ರಿಯು ಮತ್ತೆ ಬರಲೇಬೇಕಲ್ಲವೇ 

ದಣಿದ ದೇಹಕ್ಕೆ ವಿಶ್ರಾಂತಿ ಕೊಂಚ ಬೇಡವೇ ಮಗು

ಸೂರ್ಯ ಚಂದ್ರ ಬಾನಿನಲ್ಲಿ ನಿತ್ಯ ಓಡದಿದ್ದರೆ ಆದೀತೆ

ಸಕಲ ಜೀವಿಗಳಿಗೆ ಬೆಳಕು ತುಂಬಬೇಕಲ್ಲವೇ ಮಗು

ಮುಳುಗುವ ಭಾಸ್ಕರನ ನೋಡುವುದು ಅದೆಷ್ಟು ಖುಷಿ

ಬಾಯಿ ತೆರೆದು ಹಾಗೇ ನಿಂತು ಬಿಟ್ಟೆಯಲ್ಲವೇ ಮಗು

ಆಟದ ಜತೆ ಪಾಠವನ್ನು ಕಲಿತು ಜಾಣನಾಗಬೇಕು

ಹೆತ್ತ ವರಿಗೆ ಹೆಸರು,ಕೀರ್ತಿ ತರಬೇಕಲ್ಲವೇ  ಮಗು

ಗೆಳೆಯರು ಆಟಕ್ಕೆ ನಿನ್ನ ಸೇರಿಸಿಲ್ಲವೆಂದು  ಚಿಂತೆಯೇಕೆ

ನಾಳೆ ನಿನ್ನೊಡನೆ ಆಡಲು  ಬಂದೇ ಬರುವರಲ್ಲವೇ ಮಗು

ಕೋಪ ಬೇಸರ ಮನಸಿನ ಶಾಂತಿಯನ್ನು ಕೆಡಿಸುತ್ತದೆ

ಪಂಕಜಾಳಂತೆ  ನಗು ನಗುತ್ತಾ ಇರಬೇಕಲ್ಲವೇ  ಮಗು

ಪಂಕಜಾ.ಕೆ