ಕವಿ ಸಾಹಿತಿ ಚಿತ್ರಕ್ಕೊಂದು ಕಥೆ ಮದುರ ಮೈತ್ರಿ

ಮಧುರ ಮೈತ್ರಿ

ಮೋಹನ ನ ಮನಸ್ಸು ತಾನು ಮದುರಾಳನ್ನು ಭೇಟಿಯಾದ ಸುಂದರ ಕ್ಷಣವನ್ನು ನೆನೆಯುತ್ತಾ ಆನಂದದಿಂದ ತುಂಬಿತ್ತು . ಎಂತಹ ಸೌಂದರ್ಯದ ಖನಿ ಆಕೆ ಮೊದಲ ನೋಟಕ್ಕೆ ತಾನು ಅವಳಿಗೆ ಸೋತು ಹೋಗಿದ್ದೆನಲ್ಲ ,ಪೇಟೆಯಲ್ಲಿ ಬೆಳೆದ ಹೆಣ್ಣಾದರೂ ಆಕೆಯದು ಅದೆಂತ ಮೋಹಕ ಕಾಂತಿ ,ನಯ,ವಿನಯ, ಹಳ್ಳಿಯ ತೋಟದ ಮನೆಯ ಹುಡುಗನೆನ್ನುವ ಕಾರಣಕ್ಕೆ ತಂದೆ ತಾಯಿಯರ ಜತೆ ಇರಲು ಒಪ್ಪದೆ ಅದೇ ನೆಪ ಮಾಡಿಕೊಂಡು ತನ್ನನ್ನು ನಿರಾಕರಿಸಿದ ಹೆಣ್ಣುಗಳೆಷ್ಟೋ .ತಾನೂ ಅಷ್ಟೇ ತನ್ನನ್ನು ಮಾತ್ರವಲ್ಲದೆ ತನ್ನ ತಂದೆ ತಾಯಿಯನ್ನು ಪ್ರೀತಿಸುವ ಹುಡುಗಿ ಸಿಗುವ ತನಕ ಮದುವೆಯೇ ಆಗುವುದಿಲ್ಲ ಎಂದು ನಿರ್ಧರಿಸಿದ್ದೆನಲ್ಲ .ಆದರೆ ಅದೊಂದು ದಿನ ಗೆಳೆಯನ ಮದುವೆಗೆ ಎಂದು ಹೋದ ತಾನು ಮದುಮಗಳ ಸ್ನೇಹಿತೆಯ ಮೋಹಪಾಶದಲ್ಲಿ  ಹೇಗೆ ಬಿದ್ದುಬಿಟ್ಟೆ ಎನ್ನುವುದೇ ತಿಳಿಯದಾಯ್ತು. ಗೆಳೆಯನಿಗೆ ಇದರ ಸುಳಿವು  ಸಿಕ್ಕಿ ಆತ ನಮ್ಮಿಬ್ಬರನ್ನು ಅಲ್ಲೇ ಹತ್ತಿರದ ಪಾರ್ಕಿಗೆ ಕರೆದೊಯ್ದು ಪರಿಚಯಿಸಿದ್ದ. ಆಗ ಆಕೆ ತನ್ನೆಡೆಗೆ ಬೀರಿದ ನೋಟ ನಂತರ ಅವಳು ಹೇಳಿದ ಆ ಮಾತು ತನ್ನನ್ನು ಸಂಪೂರ್ಣವಾಗಿ ಅವಳನ್ನು ಒಪ್ಪಿಕೊಳ್ಳುವಂತೆ ಮಾಡಿತ್ತು.ಅದರಂತೆ ಗೆಳೆಯನ ಮಧ್ಯಸ್ಥಿಕೆಯಲ್ಲಿ ನಮ್ಮಿಬ್ಬರ ಮದುವೆ ವಿಜೃಂಭಣೆಯಿಂದ ನೆರವೇರಿತ್ತು.

                ಅದೀಗ ತಾನೇ ನವ ದಾಂಪತ್ಯಕ್ಕೆ ಕಾಲಿಟ್ಟ ಜೋಡಿಗಳಾದ ಮಧುರ ಮತ್ತು ಮೋಹನ್ ವಧೂಗೃಹ ಪ್ರವೇಶದ ಕಾರ್ಯಕ್ರಮಗಳೆಲ್ಲಾ ಮುಗಿದ ಮೇಲೆ  ಏಕಾಂತವಾಡಲು ಬಯಸಿದರು. ಮೋಹನ್ ಅವಳನ್ನು  ತಮ್ಮ ಬಾಳೆಯ ತೋಟಕ್ಕೆ  ಕರೆದೊಯ್ಯುತ್ತಾನೆ.  ನೀಲಿ ಜುಬ್ಬಾ ಬಿಳಿಯ ಪಂಚೆಯುಟ್ಟು ನೀಟಾಗಿ ಬಾಚಿದ ಕ್ರಾಪ್ ಗಡ್ಡ ಮೀಸೆಯಿಂದ ಅಲಂಕೃತನಾದ ಚೆಲುವ ಮೋಹನ,  ಮೋಹಕ ರೂಪಿನ  ಮದುರಾಳ ಕೈ ಹಿಡಿದು ಕರೆದೊಯ್ಯುವಾಗ ,ಕೇಸರಿ ಜರಿ ಸೀರೆ ಅದಕ್ಕೊಪ್ಪುವ ನೀಲಿ ರವಿಕೆಯಲ್ಲಿ ಬಿಚ್ಚಿದ ಹೆರಳಿನ ಸುಂದರಿ ಮಧುರಾ ನಾಚಿಕೆಯಿಂದ ಕಣ್ಣು ಮುಖ ತಗ್ಗಿಸಿ ಮೋಹನನ ಕೈ ಮೇಲೆ ಕೈ ಇಟ್ಟು  ಉಟ್ಟ ಸೀರೆಯ ನೆರಿಗೆ ಚಿಮ್ಮಿಸುತ್ತ  ನಿಧಾನವಾಗಿ ಬಳುಕುತ್ತಾ  ಬರುವ ಚಂದವನ್ನು ಮೋಹನ ಕಣ್ಣು ತುಂಬಿಕೊಳ್ಳುತ್ತಾನೆ.ಇಂತಹ ಸೌಂದರ್ಯ ರಾಣಿ ತನ್ನವಳು ಎನ್ನುವ ಹೆಮ್ಮೆ ಆತನ ಮುಖದಲ್ಲಿ ಒಂದು ಸಣ್ಣನೆಯ ನಗುವನ್ನು ಮೂಡಿಸುತ್ತದೆ.  ಬದುಕು ತುಂಬಾ ಸುಂದರವಾಗಿ ಆತನಿಗೆ ಕಾಣಿಸುತ್ತದೆ.ಮದುರಾ ತನ್ನಿನಿಯನ ಮನದ ಭಾವವನ್ನು ಅರಿತು ನಸುನಗುತ್ತಾ ಅವನ  ಜತೆ ನಡೆದು ಬಂದಳು

                ಪಂಕಜಾ.ಕೆ. ಮುಡಿಪು

                ನಿವೃತ್ತ ಅಸ್ಸಿಸ್ಟಂಟ್ ಪೋಸ್ಟ್ ಮಾಸ್ಟರ್