2 ಗಜಲ್ ಗಳು

ಗಜಲ್  (ಕಡಲು ವಿಷಯದ ಬಗ್ಗೆ)

ಅಂತರಾಳದಲಿ ಭಾವನೆಗಳು ಬೋರ್ಗರೆಯುತಿದೆ ಗೆಳತಿ

ಮುಖವು ಕಡಲಾಳದ ನೀರಿನ ತೆರದಿ ಶಾಂತವಾಗಿದೆ ಗೆಳತಿ.

*ನೆನಪುಗಳ ಭಾರದಿಂದ ಮನ ಜರ್ಝರಿತವಾಗಿದೆ*

ಚಿಂತೆಗಳು ಮನಸಿನಾಳವ ಕೆದಕಿ ರಾಡಿಗೊಳಿಸಿದೆ ಗೆಳತಿ

ಸಾಗರದ  ಅಲೆಯಂತೆ ಜೀವನದ ತೊರೆಗಳು ಏರಿಳಿಯುತಿವೆ

ಒಡಲಲ್ಲಿ ತುಂಬಿರುವ ನೋವನು ಹಂಚಬೇಕೆನಿಸಿದೆ ಗೆಳತಿ

ಕ್ರೂರ ಮೃಗಗಳಂತಿರುವ ಮನುಜರ  ಕಂಡು ನೆತ್ತರು ಕುದಿಯುತಿದೆ 

ಹೆಣ್ಣಿನ ಮೇಲೆ ಏಕಿಷ್ಟು ದೌರ್ಜನ್ಯವಾಗುತಿದೆ ಗೆಳತಿ

ಹೆಣ್ಣಿಲ್ಲದ ಜೀವನ ಪರಿಪೂರ್ಣವಾಗಲಾರದು ಅಲ್ಲವೇ 

ಕಣ್ಣಿದ್ದೂ ಕುರುಡರಾಗಿರುವ  ಕಾಮಾಂಧರಿಗೆ ಶಿಕ್ಷೆಯಾಗಬೇಕಾಗಿದೆ ಗೆಳತಿ

*ನಿತ್ಯವೂ ಕಾಮಾಂಧರ ಆರ್ಭಟವ ನೋಡಿ ಮನಸ್ಸು ಕಲ್ಲಾಗಿದೆ*

ಸಮಾಜಘಾತುಕರ ಸಂತತಿಯನ್ನೇ ಹೊಸಕಿ ಹಾಕಬೇಕಿದೆ ಗೆಳತಿ

ಗಂಡು ಮಕ್ಕಳಿಗೆ ಹೆಣ್ಣುಮಕ್ಕಳನ್ನು ಗೌರವಿಸಲು ಕಲಿಸಬೇಕು ಪಂಕಜಾ

*ಒಡಹುಟ್ಟಿದವರಂತೆ ಹೆಣ್ಣನ್ನು ರಕ್ಷಿಸಬೇಕಾಗಿದೆ ಗೆಳತಿ*

ಪಂಕಜಾ.ಕೆ.

: ಗಜಲ್

ಹಗಲಿರುಳು ದುಡಿಯುತ್ತಿತ್ತು ಆ ಜೀವ 

ಮಮತೆಯ ಕಡಲನ್ನು ಹರಿಸಿತ್ತು  ಆ ಜೀವ 

ಗರ್ಭದಲ್ಲಿ ನವಮಾಸ ಹೊತ್ತು ಹೆತ್ತಳು ಅವಳು

ಹೊಟ್ಟೆ ಬಟ್ಟೆ ಕಟ್ಟಿ ವಿದ್ಯೆ ಬುದ್ದಿ ಕಲಿಸಿತ್ತು ಆ ಜೀವ

ಕಂದನಿಗಾಗಿ ನೋವಲ್ಲೂ ನಗು ಬೀರುವಳು ಅವಳು

ಆತನ ಏಳಿಗೆಗಾಗಿಯೇ ಜೀವ ಸವೆಸಿತ್ತು ಆ ಜೀವ

ವೃದ್ದಾಪ್ಯದಲ್ಲಿ ಅಸರೆಯಾಗಬಹುದೆನ್ನುವ ಆಸೆ 

ನಿತ್ಯವೂ ಮಗನ ದಾರಿ ಕಾಯುತ್ತಿತ್ತು ಆ ಜೀವ

ಹೆತ್ತಮ್ಮನನ್ನು ವೃದ್ಧಾಶ್ರಮಕೆ ಅಟ್ಟಬಹುದೇ ಹೇಳು ಪಂಕಜಾ

ಹಿಂದಿನದನೆಲ್ಲಾ ನೆನೆಸುತ್ತಾ ಕಣ್ಣೀರು ಮಿಡಿಯುತ್ತಿತ್ತು ಆ ಜೀವ

ಪಂಕಜಾ.ಕೆ