rama ಪ್ರತಿಷ್ಠಾಪನೆ

ಶ್ರೀ ರಾಮ ಪ್ರತಿಷ್ಠಾಪನೆ 

ಭಾಮಿನಿ ಷಟ್ಪದಿ

ನಾಡಿನೆಲ್ಲೆಡೆ ಹಬ್ಬಸಡಗರ

ಮೂಡಿ ಬಿಟ್ಟಿದೆ ಜನರ ಮನದಲಿ

ಮೋಡಿಗೊಳಗಾಗಿಹರು ಲೋಗರು ಕಂಡು ರಾಮನನು

ಹಾಡಿ ರಾಮನ ಕೀರ್ತನೆಗಳನು

ಮಾಡಿ ಭಜನೆಯ ಸೇರುತೆಲ್ಲರು

ದೂಡಿ ಮನಸಿನ ಕಾಮನೆಗಳನು ಜಯಿಸಿ ಭಕುತಿಯಲಿ

ಹಲವು ವರುಷವು ಕಾಯ್ದ ಪಲವಿದು

ಬಲವು ಕೊಟ್ಟಿದೆ  ಬಂಧು ಜನರಿಗೆ

ಛಲವು ಮೂಡಿದೆ  ರಾಮಮಂದಿರವನ್ನು  ಕಟ್ಟಲಿಕೆ

ಮಲಿನ ಗೊಂಡಿಹ ಗರ್ಭಗುಡಿಯಲಿ

ಸಲಿಲ ಜಲವನ್ನೆರಚಿ ಬಿಡುತಲಿ

ನಳಿನನಾಭನ  ಮೂರ್ತಿ ನಿಲ್ಲಿಸಿ ಪೂಜೆ ಮಾಡುವರು

ಸೊಗವ ತೋರುವ  ರಾಮ  ಮಂದಿರ

ಜಗದ ಕಣ್ಣನು ಸೆಳೆದು ಬಿಟ್ಟಿದೆ

ಮಗುವ ಮೊಗದಾ ಮೂರ್ತಿ  ಬಕುತಿಯ ಭಾವ ಮೂಡಿಸಿದೆ

ಬಗೆಯ ಸೆಳೆಯುತ ಬಕುತರೆಲ್ಲರ 

ಮೊಗದಿ ಹಾಸವ ಮೂಡಿಸುತ್ತಲಿ

ಗಗನದಂಚನು ದಾಟಿ ಬಿಟ್ಟಿದೆ  ವೇದ ಘೋಷಗಳು

*ಪಂಕಜಾ.ಕೆ. ರಾಮಭಟ್*