ಬಾ ತಾಯಿ ಪರಮೇಶ್ವರಿ

(ವಾರ್ಧಕ ಷಟ್ಪದಿ)

ಮಾಸವಿದು ನವರಾತ್ರಿ ಹಬ್ಬದಾ ದಿನವಹುದು

ತೋಷವನು ಕೊಡುತಿಹಳು ದುರ್ಗಾಂಬೆ ಭಜಕರಿಗೆ

ಹಾಸವನು ಬೀರುತಲಿ ಬರುತಿಹಳು ಬಿಳಿಯ ವಸನವನುಟ್ಟು ಶೈಲಪುತ್ರಿ

ಮೋಸವಂಚನೆಗಳನು ಮಾಡುತ್ತಲಿರುವವರ

ರೋಷದಲಿ ತುಂಡರಿಸಿ ಶಿರವನ್ನು ಬಿಸುಡುತ್ತ

ನಾಶವನು ಮಾಡುತಿಹ ದುಷ್ಟರನು ಶಿಕ್ಷಿಸಲು ಚಂಡಿ ಚಾಮುಂಡಿಯಾಗಿ

ಹರನನ್ನೊಲಿಸಲಿಕ್ಕೆ ತಪವನ್ನು ಮಾಡುತಲಿ

ಕರಗಳಲಿ ಜಪಮಾಲೆ ಹಿಡಿಯುತ್ತ ಕುಳಿತಿಹಳು

ಹರನನ್ನೆ ಪತಿಯಾಗಿ ಪಡೆಯಲಿಕೆ ಮನದಲ್ಲಿ

ಶಿವನಾಮ ಪಠಿಸುತ್ತಲಿ

ಹರನೊಲಿದು ಬಂದಾಗ ದುಷ್ಟರನು ನಿಗ್ರಹಿಸಿ

ಹರಸತಿಯು ನವದಿನವು ತವಕದಲಿ ಬರುತಿಹಳು

ಧರೆಯೆಡೆಗೆ ಮನುಜರಾ ಕಷ್ಟಗಳ ಕಳೆಯಲಿಕೆ ದುರುಳರನು ಬಡಿಯುತ್ತಲಿ

ನವದಿನವು ಬಕುತಿಯಲಿ ಪೂಜೆಯನು ಮಾಡುತಿರೆ

ಭವಿತದಲಿ ಬರುತಿರುವ ಕಷ್ಟಗಳ ಪರಿಹರಿಸಿ

ನವರಂಗು ತುಂಬುವಳು ಭರದಲ್ಲಿ ಕರಪಿಡಿದು ಹರಿಸುತಲಿ ಕರುಣೆಯನ್ನು

ತವನಿಧಿಯೆ ಗಿರಿಜಾಂಬೆ ಬೇಡುವೆನು ಕರಮುಗಿದು

ನವರಾತ್ರಿ ದಿನದಲ್ಲಿ ಬಾ ತಾಯೆ ಮನೆ ಮನೆಗೆ

ನವವಿಧದ ಪುಷ್ಪಗಳನರ್ಪಿಸುತ ಬೇಡುವೆನು ಹರಸೆನ್ನ ಹೇ ಜನನಿಯೇ

ಕರುನಾಡ ಸಂಸ್ಕೃತಿಯ ಸಾರುತಿಹ ಹಬ್ಬವಿದು

ಹರನರಸಿ ಪಾರ್ವತಿಯ ವಿಧವಿಧದ ರೂಪಗಳು

ಮೆರವಣಿಗೆ ಮಾಡುತಲಿ ಹಲವಿಧದಲರ್ಚಿಸುತ ಪಾಡುವರು ಮಹಿಮೆಯನ್ನು

ತರತರದ ವೇಷಗಳು ಬ್ಯಾಂಡುವಾದ್ಯದ ಸಹಿತ

ಬರುತಿಹವು ನಿನ್ನನ್ನು ಕರೆತರಲು ಧರೆಯೆಡೆಗೆ

ಹರಸುತಲಿ ಬಾತಾಯಿ ಬೇಗದಲಿ ಬಕುತರಾ ಬೇಡಿಕೆಯನೀಡೇರಿಸಿ

ಪಂಕಜಾ.ಕೆ.ರಾಮಭಟ್

ಬಾಳ ಸಂಜೆ